Our da l'istorgia da la Musica Aurora
Fundaziun 1928
In marz da l’on 1928 s’han radunats üna vainchina homens da Sta. Maria e Valchava per fondar üna società da musica. Il prüm grond schaschin es lura stat quella vouta da s’accquistar instrumaints a bun predsch. I s’ha pudü cumprar tals da seguonda man. Uossa mancaiva be amo ün nom per la società nouvnaschüda.
Cun quai cha’ls musicants faivan eir davo las prouvas impissamaints invi ed innan co ha la società dess avair nom, urtaiva bain suvent, ch’els tuornaivan pür vers daman a chasa. Uschè ha lura davo üna tala nottada proponü la duonna d’ün dals musicants, cha la società pudess avair nom "Aurora", --- la daman!
Di da silvester davant l'Hotel Central 1947
Las prümas unifuormas (da seguonda man) han quels da l'Aurora cumprà l'on 1949 da la Società da musica da Wettingen.
La prüma bindera
Dal 1953 pro'l jubileum da 25 ons es la società gnüda ad üna bella bindera.
Dal 1961 s'haja pudü cumprar cul rechav d'üna gronda tombola unifuormas nouvas.
Dal 1973 succeda la prüma dretta instrumaintaziun nouva per ün import total da 40'000 frs.
Trais ons plü tard s'han decis las musicantas e'ls musicants da s'acquistar ün costüm chi ha lura imbelli l'exteriur fin dal 1988.
L'era Bruno Marcolli
La culmaina musicala pervain dal dirigient d'onur Bruno Marcolli, chi'd ha dirigi la società cun grond indschegn e savair dal 1984 fin dal 1994. Suot sia direcziun musicala ha l'Aurora ragiunt l'on 1992 il prüm rang illa terza categoria pro la festa chantunala a Felsberg.
Eir dal 1993 haja dat ün evenimaint special. Quella vouta s'haja pudü as partecipar cun success a la selecziun grischuna per la "Swiss Parade" chi'd es gnüda organisada da Radio e Televisiun svizra.
Dal 1994 fin al 1998 es stat Eduard Platzer da Burgeis (Vnuost) dirigent, cun quai chi nun es stat quella jada pussibel da chattar üna persuna indigena per quista lezcha.
Nouv e giuven schlantsch pella Musica Aurora
L'on 1998 surpiglia il giuven Jon Largiadèr da Sta. Maria la direcziun da la Musica Aurora.
L'on 2003 po la società festagiar il giubileum da 75 ons. Pro quell'occasiun vain inaugurada la nouva bindera.
Dal 2004 fin dal 2006 survain Jon sustegn da Remo Meier, medemamaing da Sta. Maria.
Festa federala da musica a Lucerna 2006
Dal 2006 sa partecipescha la musica Aurora per la prüma jada ad üna festa federala da musica e quai a Lucerna. In quel mumaint cun duos grondius dirigents Remo Meier e Jon Largiadèr.
Ün greiv temp
In gün dal 2012 vegn Jon pella vita tras ün accidaint tragic. La società ha d'accumpognar insembel cullas otras societads da musica da la Val al bun cumpogn sül ultim viadi. La società trapassa ün temp fich greiv. Però per tuots esa cler chi sto ir inavant culla musica.
Co inavant culla Musica Aurora?
In üna sezzüda extraordinaria decida la soceità da cuntinuar da far musica. Il giuven musicant Romedi Conradin da Valchava as decida da far ils cuors necessaris da dirigient. Sco vice-dirigent as metta a disposiziun Josef Mall da Sta. Maria.
Ün on plü tard ha l'Aurora fingià darcheu pudü manar tras il concert annual sco üsità.
Nouvas unifuormas e nouvs instrumaints 2014
Dal 2014 ha l'Aurora pudü s'acquistar üna nouv'unifuorma grazcha a'l grond sustegn da numerus sponsurs. Eir l'ün o l'oter instrumaint nouv s'haja pudü cumprar.
